خواطر مهداة الى والدتي في مناسبات مختلفة

2 ذو الحجة 1428 هـ
12 ديسمبر 2007
بمناسبة عيد الاضحى المبارك (أول عيد بدون أمي)

معقوله يمه هالعيد غير؟!
بعد ما كنت اجيج البيت
و اشوفج بثوبج الاخضر
تدورين و (ف) ايدج المبخر
و من تشوفيني تقولين
عسى يا بنتي عيدج خير

*
معقوله يمه هالعيد غير؟!
أدش البيت و لا ألقاج
و لا ألقى سوى ذكراج
و اذا حبيت أنا أعيدج
في هذا العيد
قريت لج فاتحة القرآن
و التكوير
و سألت و قلت:
عسى أمي ...
عساها في قبرها بخير؟!!
آآآآآآه يمه
صدق انه هالعيد غيرررر

**



3 ذو الحجة 1428 هـ
13 ديسمبر 2007

ايه يا شمسي .. ظلي ضوي..
ايه يمه.. أنا لا زلت احتاجج..
و أحتاج شمسج الحلوة
تكفين يمه لا تغيبين..
لأن يمه انتي غير..
و شمسج غير
شمس الناس تضوي الارض..
بس انتي شمسج غير..
شمسج تنعكس بالقلب..
شمسج تنعكس بالروح..
شمسج يمه تجيب الخير..
و تخلق ناس و الله غير
شوفينا..
أنا و أخواني و أخواتي..
شوفي شمسج الحلوة..
شلون لها بالنفس تأثير...
*
صرنا ننجز و ننجح..
و قلنا كل ما ننجز..
مو لاجلنا.. لكنه
لاجمل عين
قلنا شمسنا تستاهل
و اهديناج.. بدل
دكتور.. دكتورين..

*
يمه انتي مو أي أم..
انتي الأم اللي تضوي..
درب عيالها المظلم..
بألف شعاع..
و تفتح قدامهم دربين..
*

يمه تكفين لا تزعلين..
من رحتي..
جزعت و قلت:
لاجل من بانجز الحين؟؟!!
خليت ابليس يغلبني..
و ينسيني..انج شمس
ما تغيبين!!

*

يمه خلاص..
أنا بامشي على نهجج..
بربي ليث و أخوانه..
مثل ما انتي ربيتي..
لاني ادري يا يمه..
انج شمس ..
تضوي حتى للاحفاد..
و ترمي شعاع لهم بالدرب..
لاجل يحققون المراد..
و ادري يمه..
مثل ما ضويتي الدرب
لاجل باسل و حمود..
بترمين شعاع من شمسج..
لاجل ليوث..

*
ايه يمه.. يا أم الكل
بربي ليث و أخوانه
على الانجاز..
مو الانجاز الملموس..
بس الانجاز لاجل شموس..
ايه يمه.. مثل ما انتي ربيتي..

*
و ادري انج بتظلين..
حواليني .. تضويين
و على ايدي...
و ايد ليوث و اخوانه..
تشدين..
**



5 ذو الحجة 1428هـ
15 ديسمبر 2007
بمناسبة شهر محرم (أول محرم بدون أمي)

يمه..
قرّب محرم..
و قلت لازم ازور الحسين..
لبست و رحت..
وصلت الاعتاب..
و سلمت أنا على الاحباب..
و سألني جدي الحسين:
يابنتي: أمج وين؟
ترى العباس فاقدها..
و الأكبر..
و سكينة..
كلنا يا بنتي لها فاقدين..

*
هذا هو قرّب محرم..
و لا ذكرتنا..
لا بقراية و لا زيارة..
و عقولنا صارت محتارة..
و كلنا نسأل: وينها للحين؟!

*
قلت يا جدي..
غياب أمي ما هو تقصير..
و لا اهمال..
أمي يا جدي ظرفها شين..
تدري غلاك عندها يا حسين..
أمي تفداك ترى بالقلب..
و حتى بالضنى و العين..
بس أمي..
ظرفها شين..

*


قال: أعرفها..
هذي السيدة معصومة..
خدمتنا شهور و سنين..
و ياما وياما ذكرتنا..
ف مجالس عمان..
و حتى مجالس البحرين..
بس يا بنتي..
هي وين؟؟
ترى كلنا لها فاقدين..

*

قلت: آآآآآآآآآآآآه يا حسين..
أمي ترى غيّبها البين..
و هالمحرم..
احترت انا ابكيها..
و الا ابكيك..
يا نور العين !!

**

11 ذو الحجة 1428
21 ديسمبر 2007
(بمناسبة مرور شهر على وفاة والدتي و بمناسبة مرور عام على ولادة ولدي ليث في نفس اليوم)

يمه..
اليوم من أغرب الايام..
ما ادري اقول لج..
هو صدفة بحته..
و الا من ترتيب الرحمن..؟!!
قولي لي يمه..
يعني شلون..
اليوم اللي يكمّل فيه شهر
على فراقج..
ليوث يكمّل فيه العام؟؟!!!!!!
ما قلت لج يمه..
انه من أغرب الايام…!

**

و الا شلون؟
قولي لي
تنرسم ضحكة..
في عيون مليانة أحزان؟!!!
و شلون أفرح بميلاد..
و حزن الموت بعده...
مخيم في الوجدان؟؟!!
و شلون يمه..
في يوم واحد..
تجتمع ذكرى
ميلاد ضنى..
و موت و فراق..
أغلى انسان؟؟!!!!
**
تصدقين يمه..
انه الصدفة ..
في هذا اليوم..
جمّعت معاها ..
ضدين:
فرح و أحزان..
ميلاد و موت..
بس الفرق..
بشهر و عام!!!!


***


10 ذو الحجة 1428 هـ
20 ديسمبر2007
(بمناسبة نهاية عام 2007 و قرب بداية السنة الجديدة و مرور أربعين يوم على وفاة أمي الحبيبة و الذي يصادف أول يوم من السنة الجديدة)

آآآآه يا ألفين و سبعة
شللي خذيتيه مني؟!!
خليتي في قلبي فجعة..
و حرمتيني من أمي..
*
و اشفيك يا العام الجديد؟!
الكل فيك متهني..
الا أنا و اخواتي..
بنقعد ف أربعين أمي..!!!!!

**